कोसी प्रदेशको नामाकरण माओवादीको द्वैध चरित्र, पहिले पक्षमा भोटिङ, अहिले आन्दोलनमा साथ

काठमाडौं । कोसी प्रदेशको नामाकरणमा सत्तारुढ माओवादी केन्द्रको दोहोरो चरित्र देखिएको छ । प्रदेश सभा बैठकमा प्रदेशको नामाकरणका बेला कोसीको पक्षमा भोटिङ गरेको माओवादीले अहिले सडक आन्दोलनमा साथ दिँदै आएको छ ।

पहिचानवादीहरूको आन्दोलन बढ्दै गएपछि माओवादीले राजनीतिक स्पेस जोगाउन आन्दोलनलाई समर्थन गरेपछि कांग्रेस र एमाले आक्रोशित भएका छन् ।

प्रदेश १ को पुनः नामांकनको माग गर्दै पहिचान पक्षधरले काठमाडौंमा संघीय मार्च गरेको थियो । पहिचान पक्षधरको आन्दोलनमा बृहत् नागरिक आन्दोलनले एेक्यवद्धता जनाउँदै संघीय मार्च गरेको हो ।

शुक्रबार बृहत् नागरिक आन्दोलन प्रदेश १ पुनः नामाङ्कन संयुक्त संघर्ष समिति किराँत याक्थुङ चुम्लुङ, किरात राई यायोक्खा, लिम्बू विद्यार्थी मञ्च केन्द्रीय कार्य समितिलगायतका पहिचानवादी संघसंगठनले संयुक्त रूपमा मार्च गरेका हुन् । जसमा माओवादीले पनि साथ दिएको छ ।

चैत ५ गते भएको आन्दोलनका क्रममा घाइते भएका पदम लिम्बुू‘लाजेहाङ’को उपचारका क्रममा मृत्यु भएपछि आन्दोलन झन् चर्किएको छ । उनीहरुले पहिचानवादीहरू एक होऔं, प्रदेशको नाम कोशी खारेजीको माग र आन्दोलनका क्रममा मृत्यु भएका पदम लिम्बूलाई सहिद घोषणा माग गरेका थिए । कोशी प्रदेशको नाम आफूहरूलाई स्विकार नहुने भन्दै उनीहरूले प्रदर्शन गरेका हुन् ।

संयुक्त संघर्ष समितिले चैत २५ गतेपछि विराटनगरमा निर्णायक आन्दोलन गर्ने निर्णयसमेत गरिसकेको छ । जसमा माओवादीले पनि साथ दिने भएको छ । माओवादी कोसी प्रदेश संसदीय दलका नेता इन्द्रबहादुर आङ्बो चढेको गाडी पहिचानवादीहरूले आक्रमण गरेपछि माओवादी तर्सिएको हो ।

चैत २५ गते अगाडि संघर्ष समितिले मानवअधिकार आयोग, संयुक्त राष्ट्रसंघ, र विदेशी नियोगहरूमा ध्यानाकर्षण गराउने, विभिन्न साहित्यिक कार्यक्रम गर्ने, गाउँ र जिल्ला जागरणका कार्यक्रम गर्ने, सामान्य खालका सांसद अवरोध र बहिष्कार जारी राख्ने र साझा नामको बहससमेत सुरु गरेका छन् । एमाले मुख्यमन्त्री हिक्मत कार्कीको प्रस्तावमा कांग्रेस, माओवादी, एकीकृत समाजवादी, राप्रपाले कोसी नामको पक्षमा मतदान गरेका थिए । तर प्रदेशको नाम पहिचानका आधारमा राख्नुपर्ने माग तीव्र ढंगले उठेको छ ।

खबरपाटी